صبحي خليل لـ المصور : ياسمين عبد العزيز رقم 1 في مصر والمداح الناس بتستناه من السنة للسنة
حوار أحمد سالم
في عالم الدراما الرمضانية، هناك أسماء لا تكتفي بتقديم الأدوار، بل تمنحها “روحاً” تجعلك تحتار.. هل تحب ذكاءها أم تخشى مكرها؟ الأستاذ صبحي خليل، الفنان الذي صار ركناً أساسياً في “براند” المداح، يعود هذا العام ليثبت أن “عبد الرازق” ليس مجرد تابع، بل هو المحرك الخفي للصراعات، والمتلون الذي يعرف من أين تُؤكل الكتف، سواء كان اللعب مع الجن أو الإنس.
ولأن الإبداع لا يتوقف عند حدود “الخوارق”، فقد خطف الأنظار بتريند الموسم مع النجمة ياسمين عبد العزيز في (وننسي اللي كان)، ليتحول “جاد الله” الناقد اللاذع إلى حديث السوشيال ميديا بكلمتين فقط: “أسئلتك مبرتحلهاش”.
في هذا الحوار، نقتحم عالم صبحي خليل، لنسأله عن كواليس الرعب، وسر صراعه مع “جليلة”
المداح بقى (براند) رمضاني ثابت.. إزاي شفت تطور ‘عبد الرازق’ من مجرد شخصية في صراع إنساني في الجزء الأول، لحد الجزء السادس؟”
المداح بقى براند لوحده، الناس بقيت بتستناه كل سنة زي ألف ليلة وليلة والسيرة الهلالية وكده، شخصية عبد الرازق في المداح بتتحول تحول رهيب، خصوصاً وهو بينقل الصراع بينه وبين رحاب اللي كانت مرات صابر، وبتتحول من عالم الإنس إلى عالم الجن، وعبد الرازق بيساعدها وهو مصلحته في كل اعتبار، ويلعب مع أي حد، يلعب مرة مع سميح، مرة مع صابر، مرة مع رحاب، مرة مع دنيا، مرة مع خالد سرحان، أي حاجة بتلاقي عبد الرازق متلون على حسب الظروف.
إيه اللي بيخلي الجمهور لسه مشدود للمداح رغم تعاقب الأجزاء؟ هل هي ‘الحدوتة’ ولا الرعب والغموض اللي بيتجدد كل سنة؟
المداح بقاله فترة مع الناس، وبقى موجود مع الناس والناس عايزاه وبتدور عليه، والمداح ليه جمهور عريض بيستناه من سنة لسنة.
ظهور ‘سميح’ (أستاذ فتحي عبد الوهاب) نقل الصراع لمنطقة تانية خالص.. إزاي ‘عبد الرازق’ بيشوف الصراع ده؟
ده صراع مهم جداً بين الخير والشر، وده اللي قائم عليه فكرة المسلسل، الناس مابتوقفش على أحداث بعينها، وأكبر دليل إن الناس بتطلبه كل سنة، وهما بيقولوا يمكن السنادي آخر سنة، وإن أسطورة النهاية آخر جزء من المداح، لكن أنا واثق إن الجمهور يرفض ويبقي عايز المداح السنة الجاية إن شاء الله.
في مسلسل (وننسى اللي كان) بتقدم شخصية الناقد الفني، والجملة اللي قالتها لك ياسمين عبد العزيز (أنا بالذات مبرتحش لأسئلتك) بقت ‘تريند’.. قولي بقى، إيه كواليس العمل معها؟
وننسى اللي كان شخصية جديدة أوي بالنسبالي، وياسمين عبد العزيز ليها جمهورها، أقدر أقول إن ياسمين رقم واحد في النجومية في مصر، ليها جمهور عريض جداً، أنا حقيقي لما قابلتها قلتلها أنا عايز أتشاف من خلال جمهورك، ياسمين ممثلة كبيرة أوي، وليها حضور رهيب، مجرد ما بتطل على الشاشة بتفرق كتير مع الناس، وأنا بعمل الصحفي اللي واقف ضدها وبيتعامل معاها بالمرصاد لصالح شيرين رضا، لأن علاقته بشيرين علاقة جيدة، وعلاقة ممكن يكون فيها جزء رومانسي في الأجزاء اللي جاية، وعلى كلام ياسمين عبد العزيز لما قالت ‘أسئلتك مش برتحلها’، تقدر تقول إن جاد الله ناقد فني وصحفي مخضرم جداً، وعارف هو بيتكلم في إيه وعارف أسئلته بتوجع إزاي، أنا إلى الآن كل اللي ظهر للناس هما مشهدين بس، وعشان مشهدين مع نجمة بحجم ياسمين عبد العزيز، بقوا حديث السوشيال ميديا، وبقت تريند السوشيال ميديا دلوقتي (جاد الله وجليلة).
