شروق إبراهيم لـ “المصور” : “فن الحرب” مليء بالمفاجآت، وأقدم شخصية غير مسبوقة في “درش”
حوار أحمد سالم
في تألق مستمر، تعيش الفنانة الشروق إبراهيم حالة من النشاط الفني المكثف، حيث تشارك في أعمال درامية ضخمة تجمعها بكبار النجوم والمخرجين، وفي حديثها عن هذه التجارب، كشفت لنا عن تفاصيل أدوارها والصراعات التي تخوضها في “درش” والتحولات المفاجئة في “فن الحرب”.
صراعات المحاكم في مسلسل “درش”
تحدثت شروق عن دورها في مسلسل “درش” قائلة : ”أنا في مسلسل درش بعمل بنت عايدة رياض، وكنت متجوزة دسوقي اللي هو عرفة السنوسي، وأختي سارة نور، وعندي بنت ٨ سنين بنوته عسولة اسمها نيلي واسمها في المسلسل جنة، وأنا في المسلسل رافعة قضية على دسوقي عشان اطلقنا عشان ياخد البنت مني، وطول المسلسل في محاكم دي تفاصيل الدور.
عن علاقتها بالفنانة القديرة عايدة رياض والمخرج خالد أمين :”أستاذة عايدة بتحبني جداً وشكرت فيا جداً وكلامها شجعني جداً جداً وبتقولي أنا شبهها وهي صغيرة، وأستاذ خالد أمين كمخرج أول مرة أتعامل معاه وهو شاطر جداً وبيعمل شغل كويس وعامله شخصية مختلفة عليا عمري ما عملتها قبل كدا.
”فن الحرب”.. ومفاجآت خلف الأبواب المغلقة
انتقلت شروق للحديث عن تجربتها المنتظرة مع النجم يوسف الشريف : “في مسلسل فن الحرب طالعة أخت يوسف الشريف وفي مفاجآت تحصل قدام، والمفروض إنها شخصية مضايقة من اللي حصل بسبب باباها ومش طايقه باباها بسبب السمعة اللي باظت.
كيمياء العمل مع المخرج “توبة” والنجم يوسف الشريف:
“أستاذ توبة وده مش أول مرة أشتغل معاه ده تاني تعامل بينا بعد (رقم سري) وأنا بصراحة بحبه جداً وبقيت بفهمه جداً لأنه بيهتم بالتفاصيل كثيرة أوي وبيهتم بكل حاجه وبيطلع من الممثل كل حاجه، أنا بصراحة المشاهد اللي عملتها معاه في رقم سري أنا بحبها جداً لأنه بيطلع مني أحسن حاجه ممكن أي حد يتخيلها، وساعة رقم سري الناس كلها اتكلمت عن الدور وعن إن أنا اللي طلعت عملت المصايب دي كلها وهو قدر يطلع مني ده ونذاكر الشخصية سوا.
وأضافت عن بطل العمل: أستاذ يوسف الشريف شخص محترم جداً وذوق جداً وشاطر جداً وبيساعد الممثل اللي قدامه وكله طاقة بيخلي اللي بيمثل قدامه يبقى في أحسن حالاته.
