مروة الأزلي للمصور : "عيون" شخصية منكسرة ومختلفة عني تماماً.. وانتظروا "علي كلاي" رقم 1 في رمضان
حوار أحمد سالم
في قلب الدراما الشعبية النابضة بالحياة، ومن بين ضجيج “الحارة” وصراعات القوة، تطل علينا الفنانة مروة الأزلي هذا العام بوجه جديد تماماً، لتجسد شخصية “عيون”. هي ليست مجرد فتاة عادية، بل هي نبض الرومانسية وسط عالم خشن، تمزج في أدائها بين الرقة والانكسار، وبين طاعة الأهل وصراعات القلب، في هذا الحوار، تأخذنا مروة إلى كواليس عملها مع النجم أحمد العوضي، وتكشف لنا سر حماسها للمشاركة في “علي كلاي” وكيف تراهن على نجاحه في السباق الرمضاني.
الاسم “عيون” اسم لافت جداً، يا ترى الاسم ده بيعكس شخصية “رومانسية” ولا شخصية “بصيرة” وقوية بتشوف اللي غيرها مش شايفه؟
شخصية “عيون” هي بنت رومانسية بتعيش قصة حب من وهي صغيرة، وبيحصل شوية أحداث كدة ونشوف قصة الحب دي هتكمل ولا مش هتكمل.
إيه اللي جذبك في “عيون” وخلاكي تقولي إن الدور ده مختلف عن كل اللي قدمتيه قبل كدة، خصوصاً إن المسلسل فيه مزيج بين الأكشن والدراما الشعبية؟
“عيون” شخصية مختلفة عن اللي قدمتهم قبل كدة، ومختلفة عني أنا؛ لأن “عيون” هي البنت الرومانسية الحالمة، بس في نفس الوقت المنكسرة، وبتسمع كلام أهلها حتى لو ضد رغبتها، وبتنفذ كلامهم ومش بتكسره، فده دور معملتوش قبل كدة.
صفي لنا كواليس العمل مع المخرج والجهة المنتجة، وإزاي قدرتم تخلقوا روح “الحارة” أو “منطقة قطع غيار السيارات” بشكل واقعي؟
النجم أحمد العوضي الناس بتستناه كل سنة، ومن أكثر المشاهدات اللي بتحقق نجاح كبير، وطبعاً ده عنصر جاذب جداً لأي ممثل يشتغل في مسلسله، وطبعاً فيه عناصر تانية مهمة زي القصة والتأليف لأستاذ محمود حمدان، والمخرج الأستاذ محمد عبد السلام؛ مخرج شاطر جداً وعنده خبرة كبيرة، اشتغلت معاه قبل كدة في “البرنس” و”نسل الأغراب” بس كان مساعد مخرج، ودي أول مرة بشتغل معاه وهو مخرج، وكان نفسي أشتغل معاه وهو مخرج، والحمد لله هو مخرج واعي وعنده خبرة وبيركز في كل التفاصيل، وعايز ينجّح كل الناس وكل الناس تطلع في أحسن صورة.
المنافسة السنة دي شرسة جداً، في رأيك، إيه “الخلطة السرية” اللي بيمتلكها مسلسلكم وتخليه يفرض نفسه على الساحة ويجذب المشاهد من أول حلقة؟
طبعاً مع وجود شركة كبيرة زي شركة “سينرجي – Synergy”، وهي شركة مهمة في السوق وعندها خبرة وبتقدم كل حاجة عشان تنجح العمل بتاعها؛ فكل العناصر دي بتتظافر مع بعض عشان تقدم العمل في أحسن صورة. وعشان تقدم “الحارة” بالشكل الصح والشكل المقنع والواقعي، ده بيكون نتاج رؤية الشركة المنتجة مع رؤية المخرج مع مهندس الديكور والتنفيذ، كل العناصر دي بتتظافر مع بعض وبتقدم كل حاجة في العمل بشكل واقعي ومقنع.
الجمهور دايماً بيربط العوضي بـ “النجاح الساحق” في رمضان، هل ده بيشكل عليكي ضغط كشريكة له في العمل، ولا بيديكي ثقة إن العمل واصل لقلوب الناس لا محالة؟
مسلسل “علي كلاي” السنادي إن شاء الله نجاح ساحق ويبقى “نمبر وان”؛ لأن المسلسل فيه كل العناصر اللي تنجحه، وهو مسلسل دراما شعبية مع دراما اجتماعية مع أكشن مع رومانسي، هو خلطة سحرية تعجب الناس، والناس كمان بقى عندها وعي وعارفة تختار مسلسل إيه اللي حلو، فـ إن شاء الله نجاح ساحق لـ “علي كلاي”.
العوضي دايماً نمبر 1 في نسب المشاهدة في الدراما الشعبية، هل ده بيخليكي تحسي إنك داخلة مباراة كسبانة من قبل ما تبدأ؟
دايماً كدة فيه نجوم لما تشتغل معاهم بتبقى مطمن ومبسوط وعارف إن فيه نجاح كبير جاي وفيه مشاهدات عالية جداً وتكسر الدنيا، وطبعاً النجم أحمد العوضي من أهم النجوم دي.
