كريم عفيفي لـ المصور : “سيد” مزيج من الخير والشر.. ودراما “الملاجئ” تضعنا أمام مسؤولية أخلاقية
حوار أحمد سالم
بين ضحكة عفوية اعتدنا عليها، وبين ملامح تغلفها الحيرة والصراعات النفسية، يطل علينا الفنان كريم عفيفي في رمضان هذا العام بوجه مختلف تماماً، فبعيداً عن عباءة الكوميديا، قرر عفيفي أن يغوص في “جذور الظلام”، ليشارك في بطولة عمل درامي يطرح تساؤلات شائكة حول الخطايا القديمة والعدالة المؤجلة، في حوار خاص اتسم بالصراحة والمكاشفة، يكشف لنا كريم عن كواليس مشاركته في النصف الثاني من الشهر الكريم، وسر انجذابه لشخصية “سيد” التي تتأرجح بين الضحية والمحرض، وكيف يرى تأثير النشأة في دور الأيتام على مستقبل الأجيال.
اعتدنا منك على الأدوار التي ترسم البسمة، لكننا هنا أمام عمل يغوص في “الرماد” والخطايا القديمة.. ما الذي جذبك للمشاركة في هذا المسلسل؟
اللي بيشدني لأي مسلسل الحدوتة بتاعت المسلسل، والدور بيتقال فيه وبيقدم إيه، الدور مختلف ولا اتقدم قبل كدا بشكل آخر، كل دي حاجات بتشدني للعمل الفني.
ترددت أنباء كثيرة حول تأجيل المسلسل، لكنكم حسمتم الجدل بالمشاركة في “النصف الثاني” من رمضان.. كيف أثرت فترة الانتظار هذه على حماسكم كفريق عمل؟
آه، في أنباء كثيرة نزلت إن المسلسل وقف، بس الحمد لله إحنا موقفناش وعرضنا في النص الثاني من رمضان، وبس هو عادةً الحاجات اللي بتقف بتبقي كثير لإن في صعوبات بتواجه العمل الفني بشكل أو بآخر، كفكرة لحد (الفركش)، وطبيعي يكون في صعوبات ومشاكل كثير إنتاجية، فنية، أياً كان هي المشاكل، العمل الفني بيواجه مشاكل بس اللي بيعدي من كل المشاكل دي ويكمل، العمل ده بيبقي حاجة حلوة جداً.
هل ترى أن عرض المسلسل في الـ 15 يوماً الأخيرة يمنحه ميزة “التركيز المكثف” من الجمهور، خاصة مع قصة غامضة تبحث عن حل لغز قديم؟
العمل الفني الكويس بيتشاف في الـ 15 الأولى أو الثانية، 30 حلقة أياً كان بيتشاف بشكل كويس، وإحنا في رمضان كثير والوطن العربي وكل حاجة بتتشاف، بس بنسب؛ في حاجات بتتشاف أوي وحاجات بتتشاف نص نص وحاجات، وأعتقد إن الكل بيتشاف.
في النصف الثاني من رمضان، يميل الجمهور للبحث عن “الوجبة الدرامية الدسمة”، كيف يراهن كريم عفيفي على شخصيته في هذا العمل ليكسب الرهان بعيداً عن الكوميديا؟
هي شخصية عادية مش نقدر نصنفها إنها كوميديا، عندها حاجات كثير، عنده نسبة خير وشر وصداقة وأمانة وكوميديا وتراجدي، موجود ميكس في كل حاجة، وبإذن الله الشخصية تعجب الناس وتتبسط معاها.
هل تعتبر هذا المسلسل “نقطة تحول” لتمرد كريم عفيفي على الكوميديا وإثبات قدراتك في الدراما النفسية الثقيلة؟
مش فكرة نقطة تحول أو لا، إحنا مش أول مرة نلعب الدور ده، إحنا عملنا كدا في (ولد الغلابة) و(رمضان كريم)، دايماً بحاول أعمل الكوميدي اللي ليه درامته اللي ليه حياته، دايماً بحاول أسعى ورا ده وأنا سعيد بده.
بدون حرق للأحداث، ما هي طبيعة الروابط التي تجمع شخصيتك بالإعلامي “ياسين”؟ هل أنت الصديق الذي يحاول إخماد حرائق ماضيه، أم أنك جزء من تلك “الحقائق المدفونة”؟
أنا بلعب شخصية (سيد)، كان صديق للإعلامي ياسين اللي هو محمد رجب، أنا جزء من ماضيه ومن حاضره وجزء من مستقبله.
العمل يتحدث عن “جذور الظلام”، هل شخصيتك في المسلسل ضحية لهذا الظلام أم أحد المحرضين الذين أشار إليهم ملخص القصة؟
شخصية سيد في بعض الأحيان بتبقي جزء من المحرضين، وبعض الأحيان بتبقي جزء من ضحية اللي حصل، وبعض الأحيان بيبقي شخص جميل ومسالم، هو عنده ميكس كبير بين كل الحاجات.
المسلسل يطرح فكرة “بناء النجاح على أنقاض جريمة”، من وجهة نظرك، هل ترى أن شخصيات العمل تبحث عن التطهر أم أن الغرق في “أبواب الجحيم” هو مصير حتمي؟
يطرح الملاجئ ودار الأيتام وإن اللي بيحصل ده ممكن يسبب إيه للأطفال اللي عايشين لما يكبروا حتى لو ربنا نجاهم من اللي حصل، بيسبب لهم مشاكل قد إيه في حياتهم اللي جاية، حتى لو حياتهم اللي جاية حلوة، فمن اللي شافوه في بعض الملاجئ ودار الأيتام اللي مش كويسة بيسبب لهم مشاكل كبيرة.
الجمهور يرتبط بك عاطفياً دائماً.. هل تتوقع أن “يكره” الجمهور شخصيتك في هذا العمل أم سيتعاطف مع دوافعها؟
لا معتقدش الجمهور يكره سيد، هو ممكن يكره في بعض الأحيان بس أعتقد هما يحبوه، هو شخصية قريبة من الناس وشخصية لذيذة، هو واحد زيه زي ناس كثير عايشة وأعتقد إنه يحبوه زيه زي الناس.
إذا كان عليك وصف المسلسل بجملة واحدة تثير فضول المشاهدين، فماذا تقول؟
أوصف المسلسل بأي حد مسؤول عن مكان فيه أطفال يتقي ربنا في الأطفال دول، إحنا بنبني حاجة جواهم، فالحاجة دي حرام تطلع تأثر على المجتمع وتأثر عليهم وتأثر على كل حاجة بعد كدا، وخاصة الطفل اللي بيبقي بدون أب وأم وأهل، فلازم نبقي نتقي الله ونخلي بالنا منهم.
رسالة من كريم عفيفي لجمهوره الذي اعتاد أن يراه “مصدر بهجة”، والآن سيراه وسط صراعات “جذور الظلام”؟
كل سنة وأنتم طيبين ورمضان كريم، ودايماً نتقابل في فرح، وربنا يحفظ بلادنا وأشوفكم دايماً في أحسن صحة وأحسن حال.
