دنيا جمعة في حوار خاص لـ المصور : "دهب" نقلة نوعية في مشواري.. وياسمين عبدالعزيز "سند"
حوار أحمد سالم
بخطوات واثقة وطلة تخطف الأنظار، تقتحم الفنانة الشابة دنيا جمعة موسم دراما 2026 من الباب الكبير، بمشاركتها في العمل الضخم “وننسى اللي كان”، هي ليست مجرد ممثلة شابة، بل موهبة استطاعت أن تحجز لنفسها مكاناً بجانب “نجمة مصر الأولى” ياسمين عبدالعزيز، بين الرهبة الأولى والدعم المستمر، تفتح دنيا قلبها لتحدثنا عن كواليس شخصية “دهب”، وكيف رسم المخرج محمد الخبيري والمؤلف عمرو محمود ياسين ملامح هذا الدور الذي تعتبره نقطة تحول حقيقية.
في البداية مبروك الانضمام لعمل ضخم زي “وننسى اللي كان”.. قولي لنا إزاي تم ترشيحك لدور “دهب”؟ وهل كنتِ تتوقعي الوقوف أمام ياسمين عبدالعزيز في سن مبكرة كدا؟
الترشيح جه من الأستاذ عمرو محمود ياسين والأستاذ محمد الخبيري، ومكنتش أتوقع إطلاقاً، حتى بعد ما مضيت مكنتش مصدقة.
وصفتِ ياسمين عبدالعزيز بأنها “النجمة الأولى في مصر”.. إحساسك كان إيه في أول “شوت” جمعك بيها؟ وهل الرهبة دي اتكسرت بسرعة؟
هي فعلاً نجمة مصر الأولى سينمائياً ودرامياً؛ لأن ليها جمهور كبير جداً جداً في الوطن العربي كله. أنا كنت مخضوضة لأن ليها هيبة مرعبة، نجمة فعلاً بمعنى الكلمة وتخض أي حد بصراحة يقف قدامها، لأن هي نجمة كبيرة جماهيرياً ومتشافه بشكل مرعب ما شاء الله، وهي اللي كسرت الرهبة دي معانا كلنا من أول مشهد بهزارها معانا وخوفها على شغلنا وشكلنا.
بتلعبي دور “ميكب أرتيست” الخاصة بالنجمة ياسمين عبدالعزيز.. هل استعنتِ بخبيرات تجميل حقيقيات عشان تتقني “تكنيك” المهنة؟ ولا اعتمدتِ على رؤيتك الفنية؟
فعلاً استعنت بخبير التجميل الخاص بيها “بيچو” علشان أعرف أتعامل إزاي في الأسلوب اللي هي متعودة عليه في الشغل.
ذكرتِ إن الدور ده مختلف تماماً عن اللي قدمتيه قبل كدا.. إيه هو “المفتاح” اللي استخدمتيه عشان تدخلي لشخصية “دهب”؟ وهل فيها شبه من دنيا جمعة في الحقيقة؟
مختلف لأنه مع نجمة كبيرة فترتيباته كانت مختلفة بالنسبة لي، لأن دوري بيجمعني بيها في 90% من الأحداث، وهي شبهي في حاجات كتير.
بما إن المسلسل من تأليف عمرو محمود ياسين، المعروف باهتمامه بتفاصيل الأدوار الشابة.. إيه هي النصيحة اللي قدمها لكِ بخصوص شخصية “دهب”؟
الحقيقة أستاذ عمرو قدم لي نصايح كتير جداً، منها تفاصيل في الشخصية نفسها، ساعدني بيها إزاي التركيز في كل مشهد ومذاكرته أكتر من مرة من نواحي مختلفة علشان نرسم الشخصية صح.
المسلسل بيضم كوكبة من النجوم (خالد سرحان، محمد لطفي، منة فضالي).. مين أكتر حد فيهم كان “فاكهة” اللوكيشن وبيخفف من توتر التصوير؟
كاست إضافة وكلهم دمهم زي العسل، وكانت الأجواء لذيذة حتى النجوم اللي مش بتجمعني بيهم مشاهد كنا بنتقابل في الكواليس ونهزر ونضحك ونقعد مع بعض وندعم بعض، وكلهم دعموني بكلام كويس جداً، خاصة كريم فهمي، ياسمين عبد العزيز، خالد سرحان، أحمد سعيد عبد الغني، محمد لطفي، وعمر شرقي كلهم زمايلي وإخواتي الكبار.
بعد نجاحك في مسلسل “فات الميعاد”، شايفة إزاي تجربة “وننسى اللي كان” هتغير من خريطة مستقبلك الفني في 2026؟
وننسى اللي كان” مختلف تماماً عن “فات الميعاد”؛ لأن دوري مع النجمة ياسمين عبد العزيز أولاً، فهي بتقدمني لجمهورها هي، وأستاذ عمرو وأستاذ الخبيري وأستاذ كريم.. النجاح مضمون معاهم، والعمل ضخم إنتاجياً وتأليفاً وأحداثاً وكل شيء.
كلمينا عن المخرج محمد الخبيري.. إزاي قدر يخرج منك انفعالات مختلفة في دور “دهب”؟
أستاذ محمد الخبيري شاب وقريب من سننا فإحنا بنتعامل كأصدقاء، وبيسمح لنا نقول وجهة نظرنا ونتشاور، وسايبنا بثقة علشان كدة بنعمل أحسن ما عندنا ومفيش توتر إطلاقاً، والثقة عامل مهم إننا منخافش نبدع.
لو “دهب” حبت توصف علاقتها بـ “ياسمين عبدالعزيز” في المسلسل بكلمة واحدة.. هتكون إيه؟
ياسمين عبد العزيز “سندي”، وسندنا كلنا الحقيقة، أخت كبيرة مش عاملة بينا مسافات خالص.
