رضا عبد العال للمصور: المنتخب هيبقى حصالة في المونديال لو ملعبناش كورة.. وخروج الأهلي أفريقيًا سببه المجاملات وفرد العضلات
حوار: كيان الزهري.
في وقت أصبحت فيه المجاملات عنوانًا بارزًا في الوسط الكروي، يخرج هذا المحلل بآراء حادة وصريحة، لا تعرف المواربة، مؤكدًا أن الحقيقة أهم من إرضاء الجمهور. وفي هذا الحوار، يفتح النار على أوضاع الكرة المصرية، متحدثًا عن المنتخب، والدوري، وخروج الأهلي، دون حسابات.
في البداية.. حضرتك معروف بآرائك الصريحة في التحليل، هل ترى أن الصراحة تُفهم أحيانًا بشكل خاطئ؟
الصراحة راحة، وأنا هفضل كده ومش هغير. الجمهور أحيانًا بيحب اللي يطبل، لكن أنا مش من النوع ده. بقول الحلو حلو والوحش وحش، واللي يزعل يزعل. ما عنديش حاجة اسمها أمسك العصاية من النص.
دائمًا تؤكد أن التحليل فن وليس عشوائي.. ما أبرز توقع تعرضت بسببه لانتقادات ثم أثبت صحته؟
توقعي إن منتخب مصر مش هيعمل حاجة في كأس العالم. وقتها اتهاجمت جدًا، لكن بعد ما ماخدناش ولا نقطة، الناس رجعت وقالت إن الكلام كان صح. المشكلة إننا وقتها ما كناش بنلعب كرة حقيقية.
كيف ترى الفارق بين جيلكم والجيل الحالي؟
الفارق كبير جدًا. زمان كان فيه مهارة أكتر رغم سوء الملاعب والإمكانيات، وكنا بنلعب في كل محافظات مصر. دلوقتي الوضع مختلف، والفلوس بقت عامل أساسي، مش حب اللعبة زي زمان.
ما أبرز التحديات التي تعيق تطور الكرة المصرية؟
المجاملات وسوء اختيار الأشخاص في المناصب. لما تحط شخص مش فاهم، طبيعي المنظومة كلها تتأثر. وكتير من المسؤولين أصلًا ما لعبوش كرة.
كيف تقيم مستوى الدوري المصري؟
بكل وضوح: 1 من 10. في مشاكل كتير جدًا محتاجة إصلاح جذري.
كيف ترى خروج الأهلي من دوري أبطال أفريقيا؟
نتيجة طبيعية للمجاملات والتطبيل والاختيارات الغلط. الأخطاء كانت واضحة من الموسم الماضي، لكن تم تغطيتها بصفقات بدل حلها، فكانت النتيجة الإخفاق.
من يتحمل المسؤولية الأكبر: الجهاز الفني أم اللاعبون؟
الإدارة أولًا، وأحط تحتها 100 خط.
هل الفريق بحاجة لتغييرات بعد هذا الخروج؟
طبعًا. لازم ثورة في الفريق، وتحديد سقف للعقود. اللي مش عاجبه يمشي، عشان يرجع الأهلي لمستواه الحقيقي.
ما توقعك لمشوار منتخب مصر في كأس العالم؟
إحنا مش رايحين ناخد الكأس. لو عملنا إنجاز زي المغرب، يبقى ده نجاح كبير. لازم نبقى واقعيين.
ما أهم نقطة يحتاجها المنتخب للتطور؟
ببساطة: نلعب كرة.
من اللاعب الصاعد الذي تتوقع له مستقبلًا كبيرًا؟
فيه أسماء كويسة زي محمد شحاتة ومحمود صابر، وفيه عناصر واعدة تانية.
كيف ترى مستوى المباريات الودية الأخيرة؟
المباريات الجاية هتكون أصعب، والفوز على السعودية مش مقياس حقيقي لأن مستواهم ما كانش الأفضل.
لو عاد بك الزمن.. ماذا كنت ستغير في مسيرتك؟
يمكن إني ما كنتش بسمع كلام المدربين وكنت بلعب بدماغي. ولو رجع بيا الزمن، غالبًا هعمل نفس الشيء.
كيف ترى تجربة انتقال عبد الله السعيد؟
تجربته مختلفة تمامًا عن حالتي، ومش مباشرة زي ما الناس فاهمة، لأنه مرّ بعدة مراحل قبل انتقاله الأخير.
انتقدت مدربين كثيرين.. ماذا عن من نجحوا مثل كولر؟
حقق بطولات، لكن مش شايفه عبقري. العبقري كان فايلر، وهو اللي الكرة المصرية خسرته.
هل لديك خلافات مع شخصيات رياضية؟
لا، كلها منوشات عادية، وأول ما بنشوف بعض بنسلم، مفيش خلافات حقيقية.
ختامًا.. كيف تصف فلسفتك في التحليل؟
بقول الحقيقة زي ما بشوفها، حتى لو الناس زعلت.. وفي النهاية الوقت هو اللي بيحكم.
وبين صراحةٍ لا تعرف المجاملة، وتصريحاتٍ لا تخشى الجدل، يظل رضا عبد العال صوتًا مختلفًا في التحليل الكروي، يراهن دائمًا على أن الحقيقة -مهما كانت قاسية- هي الطريق الوحيد للإصلاح.
